National News » ट्वान्टी-२० विश्वकप छनोट अघिको अभ्यास खेलमा नेपालले यूएईलाई ५ विकेटले पराजित

भिडियो हेर्न तल क्लिक गर्नुहोस

काठमाडौं, कार्तिक २६ । युएइमा शुक्रबारदेखि हुन गइरहेको आइसीसी ट्वान्टी–२० विश्वकप क्रिकेट छनोट चरणको तयारीमा रहेको नेपालले युएइ विरुद्धको अभ्यास खेलमा ५ विकेटको जित हात पारेको छ । कप्तान पारस खड्काले सानदार इनिङ खेलेपछि नेपालले १ सय ३९ रनको चुनौती ३ बल अगावै ५ विकेट गुमाएर पूरा गरेको हो ।

पारसले ६२ बलमा अविजित रहँदै ८५ रनको योगदान दिएको इनिङमा उपकप्तान ज्ञानेन्द्र मल्लले २५ तथा सुवास खकुरेलले १४ रन जोडे ।

यसअघि टस हारेर पहिले ब्याटिङ गरेको घरेलु टोली युएइले निर्धारित २० ओभरमा ७ विकेटको क्षतिमा १ सय ३८ रन बनायो । खुराम खानले सर्वाधिक ५५ रन बनाएको इनिङमा जितेन्द्र मुखियाले ३ विकेट लिए ।

यस्तै अमृत भट्टराई, पारस खड्का, बसन्त रेग्मी र सागर पुनले समान १–१ विकेट झारे । दोस्रो अभ्यास खेलमा नेपालले भोलि अमेरिकाको सामना गर्नेछ । १६ टिम सहभागी रहेको विश्व टी–२० छनोट प्रतियोगिताको पहिलो खेलमा कार्तिक २९ गते नेपालले डेनमार्कको सामना गर्दैछ ।

समूह ‘बी’मा नेपालसँगै डेनमार्क, केन्या, स्कटल्याण्ड, पपुवा न्यूगिनी, नेदरल्याण्डस्, बर्मुडा र अफगानिस्तान रहेका छन् ।

प्रतियोगिताको शीर्ष ६ मा पर्ने टिमले अर्को वर्ष बंगलादेशमा हुने टी–२० विश्वकप खेल्न पाउने छन् ।

0 comments

Write Down Your Responses