३१ असार, काठमाण्डौ । एक सय रुपैयाँमा गरिब बालबालिकालाई शिक्षा दिएर राष्ट्रिय तथा अन्तर्राष्ट्रिय ख्याती कमाएका समता शिक्षा निकेतनका सञ्चालक उत्तम सञ्जेलमाथि आइतवार साँझ गुन्डाको एक समूहले आक्रमण गरी नाक भाँच्चिएको छ । राजधानीको बौद्ध कुमारीगालस्थित समता स्कुलकै समता क्लिनिकमा रहेका बेला ३-४ जनाको समूहमा आएका गुण्डाहरुले आक्रमण गरेको सञ्जेलले वताए ।

सुञ्जेललाई सुशील नामका व्यक्तिले आक्रमण गरेको प्रहरीले जनाएको छ ।  स्कुलको काम गर्ने ठेकेदारसंग लेनदेनको विषयमा छलफल गर्न आएको वताउने ती व्यक्तिले क्लिनिकको गेटमा उभिइरहेका सञ्जेलको अनुहारमा मुक्का प्रहार गरेका थिए । आजको अन्नपूर्ण पोष्ट दैनिकले समाचार छापेको छ ।

नाकमा चोट लागेका सञ्जेल सुरुमा चाबहिलस्थित मेडिकेयर अस्पतालमा प्रारम्भिक उचार गरी टोखास्थित ग्रयान्डी इन्टरनेश्नल हस्पिटलमा गएका छन् । डा चक्रराज पाण्डेले उनको उपचार सुरु गरिसकेको जानकारी अस्पतालमा रहेका सञ्जेलका आफन्तले वताए ।