हत्यारालाई छुटाउन कीर्ते कागज बनाएको अभियोगमा मुछिए वकिलका नेता

९ असार, पोखरा । घटना २० बर्षअघिको हो । पोखरा बाग्लुङ राजमार्गको नयाँ पुलमा तीन जना मिलेर बाबुरा रोकाको हत्या गरे । अभियुक्तहरु फरार थिए, जिल्ला र पुनरावेदन अदालतले अभियुक्तहरुलाई हत्यारा ठहरगर्दै जन्मकैदको फैसला सुनायो ।



तिनैमध्येका एक पूर्णबहादुर श्रेष्ठ गत पुस महिनामा पक्राउ परे । तर, उनी हत्याका दोषी होइनन् भन्दै बन्दी प्रत्यक्षीकरणको रिट दायर भयो । उनी सजाय ठहर भएका व्यक्ति होइनन् भनेर प्रमाणित गर्न कीर्ते कागजातसमेत बनाएर अदालतमा प्रस्तुत गरियो । पुनरावेदन अदातलले त्यो रिट खारेज गर्ने आदेश दियो । २७ जेठमा सर्वोच्च अदालतले पनि पुनरावेदनकै फैसलालाई सदर गरिदिएपछि पूर्णबहादुर जन्मकैदको सजाय भोग्न बाध्य भएका छन् ।

बन्दी प्रत्यक्षीकरणको यो मुद्दा जित्न पूर्णबहादुरको दाजुभाईको संख्या नै बढाएर नक्कली कागजात बनाइएको र त्यही आधारमा मुद्दा खडा गरिएको घटनाले यतिबेला कानुनी जगतमा हल्लीखल्ली मच्चिएको छ ।

रोकाको हत्या अभियोग प्रमाणणित भएर अदालतबाट सर्वस्वसहित जन्मकैदको सजाय पाएका लाहाचोक-५, कास्कीका पूर्णबहादुरलाई रिहा गर्न उनकी पत्नी सावित्रीले पुनरावेदन अदालत पोखरामा बन्दी प्रत्यक्षीकरणको रिट हालेकी थिइन् । उनको रिटमा पक्राउ परेका पूर्णबहादुर अदालतबाट सजाय सुनाएका कुमार श्रेष्ठभन्ने व्यक्ति नभएको दतर पक्राउ परेका व्यक्तिको नाम नागरिकतामा पूर्णबहादुुर भएको दाबी गर्दै उनलाई तत्काल रिहा गर्ने मागसहित सावित्री अदालत गएकी आइतबार प्रकाशित नेपाल साप्ताहिकमा खबर छ ।

अदालतमा पेस गरिएका कागजातमा मालपोत कार्यालयको कागजातसमेत सच्याएर पूर्णबहादुर निर्दोष सिद्द गर्न खोजिएको देखिएपछि पुनरावेदन अदालत पोखराको २१ फागुनमा बन्दी प्रत्यक्षीकरणको त्यो रिट खारेज गरिदिएको र पछि सर्वोच्चले त्यसैलाई सदर गरेको हो ।

पुनरावेदन अदालतका न्यायाधीश विश्वम्भरप्रसाद श्रेष्ठ र डिल्लीराज आचार्यको संयुक्त इजलासले उक्त बन्दी प्रत्यक्षीकरण रिट खारेज गरेको थियो । २५ पुस ०६९ मा परेको यो रिटमा सावित्रीका तर्फबाट नेपाल बार एसोसिएसनका उपाध्यक्ष टिकाराम भट्टराई र नेपाल बार एसोसिएसन कास्कीका अध्यक्ष कमलप्रसाद अर्यालले बहस गरेका थिए ।