उत्तर कोरियाली नेताले आफ्नै फूपाजुलाई फाँसी दिए
भिडियो हेर्न तल क्लिक गर्नुहोस
|
कुनै बेलाका ‘महान नेता’लाई भनियो–‘कुकुरभन्दा पनि निच’
२८ मंसिर, काठमाडौं । उत्तर कोरियाली नेता किम जोङ्ग उनले आफ्नै फूपाजु एवं शक्तिशाली सैन्य जर्नेल चाङ्ग सोङ्ग थाएकलाई फाँसी दिएका छन् ।
कुनै समय उत्तर कोरियाली सरकारमा शक्तिशाली व्यक्ति र शासन ब्यबस्थाको मेरुदण्डका रुपमा रहेका चाङ्गमाथि देशद्रोह र भ्रष्टाचारको आरोपमा फाँसी दिइएको उत्तर कोरियाको सरकारी संचारमाध्यमले जनाएको छ ।
यो साता निकै नाटकीय रुपमा चाङ्गलाई कम्युनिष्ट पार्टीको महत्वपूर्ण पदबाट हटाइएको थियो । २ वर्ष पहिले आफ्ना बाबुको निधन भएपछि किम जोङ्ग उनले उत्तर कोरियाको सत्ता सम्हालेका थिए । त्यसपछिको यो सबैभन्दा ठूलो राजनीतिक उथलपुथल मानिएको छ ।
 |
| उत्तर कोरियाली शासनका दोस्रो हस्ती मानिने जनरल थायक किम जोङ उनसँग |
सरकारी समाचार एजेन्सी केसीएनएका अनुसार चाङ्गले बिहीबार एक सैन्य अदालतसामू सत्ताप्लटको प्रयास गरेको स्वीकार गरेका थिए । लगतै उनलाई मृत्युदण्डको सजाय दिइएको हो । उनले आफ्नो पदको दुरुपयोग गरेको र राजनीतिक महत्वकांक्षा पूरा गर्न सरकारविरुद्ध षड्यन्त्रको प्रयास गरेको स्वीकार गरेका छन् ।
बाबु किम जोङ्ग इलको निधनपछि सत्ता सम्हाल्दा चाङ्गले किम जोङ उनलाई व्यवस्था र शासन बुझ्न निकै सहयोग गरेका थिए । अहिले सरकारी सञ्चार माध्यमहरुले उनलाई ‘कुकुरभन्दा पनि खराव’ भनेका छन् ।
चाङ्गको विवाह किम जोङ इलकी बहिनीसँग भएको थियो । उनी सत्तारुढ कम्युनिष्ट पार्टी र देशको सबैभन्दा ठूलो सैन्य संस्था राष्ट्रिय रक्षा आयोगको वरिष्ठ पदहरुको जिम्मेवारी सम्हालिसकेका थिए । उनी अधिकांश समय किम जोङ इलसँग देखिन्थे ।
चाङलाई आयोगको महत्वपूर्ण पदबाट हटाएको र उनका दुई सहयोगीलाई मृत्युदण्ड दिइएको यसै महिना मात्र सार्वजनिक भएको थियो । सोमबार मात्र केसीएनएको एक रिपोर्टमा चाङलाई बर्दीधारी गार्डले पार्टी बैठकबाट हटाइएको देखाएको थियो ।
यो घटनापछि छिमेकी मुलुक दक्षिण कोरिया, अमेरिका, जापान लगायतका मुलुकले उत्तर कोरियाको पछिल्लो अबस्थाबारे निगरानी गरिरहेको बताएका छन् । ह्वाइट हाउसले उत्तर कोरियाली मिडियाले सार्वजनिक गरेजस्तै थाएकलाई मृत्युदण्ड दिइएको भए कोरियाली सरकारको क्रुरताका रुपमा बुझिने टिप्पणी गरेका छन् । यद्यपी उनले उत्तर कोरियाली मिडियको रिपोर्टमा अबिश्वास गर्नुपर्ने कारण नरहेको बताएका छन् ।
भिडियो हेर्न तल क्लिक गर्नुहोस
|
0 comments
Write Down Your Responses